
نوشکی(یو این اے )ضلع نوشکی کے علاقے گلنگور کوٹھاری کے قریب قومی شاہراہ پر نامعلوم مسلح افراد نے دو بوزر (فیول ٹینکر)گاڑیوں کو آگ لگا دی، جس کے نتیجے میں دونوں گاڑیاں جل کر مکمل طور پر تباہ ہوگئیں۔واقعے کے بعد سیکیورٹی فورسز نے فوری کارروائی کرتے ہوئے گلنگور، کیشنگی اور نوشکی کے مختلف مقامات پر سیکیورٹی مزید سخت کر دی ہے۔ حکام نے احتیاطی تدابیر کے طور پر آنے اور جانے والی گاڑیوں کی نقل و حرکت عارضی طور پر روک دی، جبکہ مین شاہراہ ہر قسم کی ٹریفک کے لیے بند کر دی گئی ہے۔ذرائع کے مطابق علاقے میں سرچ اور نگرانی کا عمل جاری ہے، جبکہ واقعے کی تحقیقات بھی شروع کر دی گئی ہیں تاکہ ملوث عناصر کا سراغ لگایا جا سکے۔انتظامیہ نے مسافروں سے اپیل کی ہے کہ وہ غیر ضروری سفر سے گریز کریں، روانگی سے قبل متعلقہ حکام یا قابل اعتماد ذرائع سے راستوں کی تازہ صورتحال معلوم کریں اور سیکیورٹی اہلکاروں کی ہدایات پر مکمل عمل کریں۔ حکام کے مطابق ٹریفک کی بحالی اور صورتحال سے متعلق مزید پیش رفت سے عوام کو بروقت آگاہ کیا جائے گا۔



