بلوچستانتازہ ترینپاکستان

دشت میں راستہ بھٹکنے والے خاندان پر مسلح افراد کی فائرنگ، خاندان کا سربراہ جاں بحق، خاتون شدید زخمی

گوگل میپ کی رہنمائی پر مرکزی شاہراہ چھوڑ کر کھنڈ کے علاقے پہنچنے والے خاندان کے دو بچے محفوظ، سرکاری مقف کا انتظار

دشت میں راستہ بھٹکنے والے خاندان پر مسلح افراد کی فائرنگ، خاندان کا سربراہ جاں بحق، خاتون شدید زخمی
دشت میں راستہ بھٹکنے والے خاندان پر مسلح افراد کی فائرنگ، خاندان کا سربراہ جاں بحق، خاتون شدید زخمی

کوئٹہ(یو این اے )بلوچستان کے دارالحکومت کوئٹہ کے نواحی علاقے دشت میں ایک افسوسناک واقعہ پیش آیا ہے، جہاں کراچی سے کوئٹہ آنے والا ایک خاندان مبینہ طور پر گوگل میپ کی رہنمائی پر راستہ بھٹک کر دور افتادہ علاقے کھنڈ پہنچ گیا۔ اسی دوران نامعلوم مسلح افراد نے ان کی گاڑی پر اندھا دھند فائرنگ کر دی، جس کے نتیجے میں خاندان کا سربراہ موقع پر جاں بحق جبکہ ایک خاتون شدید زخمی ہو گئیں۔ یو این اے کے مطابق خاندان نجی گاڑی پر کراچی سے کوئٹہ آ رہا تھا۔ سفر کے دوران مبینہ طور پر گوگل میپ کی رہنمائی پر وہ مرکزی شاہراہ چھوڑ کر دشت کے ایک غیر معروف اور دشوار گزار راستے پر چلے گئے اور کھنڈ کے علاقے میں پہنچ گئے۔ اسی دوران وہاں موجود نامعلوم مسلح افراد نے ان کی گاڑی کو نشانہ بنایا اور فائرنگ کر دی۔ فائرنگ کے نتیجے میں گاڑی میں سوار خاندان کے سربراہ نے موقع پر ہی دم توڑ دیا، جبکہ ایک خاتون شدید زخمی ہوئیں۔ گاڑی میں موجود دو معصوم بچے خوش قسمتی سے محفوظ رہے اور انہیں کوئی جسمانی نقصان نہیں پہنچا، تاہم وہ شدید خوف اور صدمے کا شکار بتائے جا رہے ہیں۔اطلاع ملنے پر مقامی افراد اور متعلقہ اداروں نے جائے وقوعہ پر پہنچ کر امدادی کارروائیاں شروع کیں۔ جاں بحق شخص کی لاش اور زخمی خاتون کو فوری طور پر قریبی اسپتال منتقل کیا گیا، جہاں خاتون کو طبی امداد فراہم کی جا رہی ہے۔ اسپتال ذرائع کے مطابق زخمی خاتون کی حالت تشویشناک بتائی جا رہی ہے اور انہیں خصوصی نگہداشت میں رکھا گیا ہے۔ ذرائع کا کہنا ہے کہ واقعے کے بعد علاقے میں سیکیورٹی اداروں نے سرچ آپریشن شروع کر دیا ہے اور حملہ آوروں کی تلاش کے لیے مختلف مقامات پر ناکہ بندی بھی کی گئی ہے۔ جائے وقوعہ سے شواہد اکٹھے کیے جا رہے ہیں تاکہ واقعے کی نوعیت اور ذمہ دار عناصر کا تعین کیا جا سکے۔ ابتدائی اطلاعات کے مطابق واقعہ اس وقت پیش آیا جب خاندان غیر ارادی طور پر ایسے علاقے میں داخل ہو گیا جہاں عام شہریوں کی آمدورفت نہ ہونے کے برابر ہے۔ تاہم اس حوالے سے ابھی تک کسی بھی سرکاری ادارے کی جانب سے واقعے کی وجوہات یا حملہ آوروں کے بارے میں کوئی باضابطہ بیان جاری نہیں کیا گیا۔ واقعے نے ایک بار پھر دور افتادہ علاقوں میں سفر کے دوران احتیاطی تدابیر اختیار کرنے کی ضرورت کو اجاگر کر دیا ہے۔ شہری حلقوں کا کہنا ہے کہ غیر مانوس علاقوں میں صرف ڈیجیٹل نقشوں پر انحصار کرنے کے بجائے مقامی انتظامیہ یا متعلقہ اداروں سے راستے کی تصدیق بھی کی جانی چاہیے، خصوصا ایسے علاقوں میں جہاں سیکیورٹی صورتحال حساس ہو۔ دوسری جانب پولیس اور دیگر قانون نافذ کرنے والے اداروں نے واقعے کی تحقیقات کا آغاز کر دیا ہے۔ حکام کا کہنا ہے کہ تمام پہلوں کا جائزہ لیا جا رہا ہے اور حملے میں ملوث عناصر کو قانون کے کٹہرے میں لانے کے لیے ہر ممکن اقدامات کیے جائیں گے۔

 

متعلقہ خبریں

Leave a Reply

Your email address will not be published. Required fields are marked *

Back to top button