کوئٹہ (یو این اے)صوبائی دارالحکومت کوئٹہ کے علاقے کچلاک میں شادی کی تقریب کے دوران اچانک گولی چلنے سے دلہن کے والد جاں بحق ہوگئے، جس کے باعث شادی کی خوشیاں غم میں تبدیل ہوگئیں۔ذرائع کے مطابق کچلاک میں ایک گھر میں شادی کی تقریب جاری تھی، جہاں خوشی کا اظہار کرنے کے لیے فائرنگ بھی کی گئی۔ بتایا جاتا ہے کہ فائرنگ کے بعد بندوق میں ایک گولی باقی رہ گئی تھی اور اسلحہ ایک طرف رکھ دیا گیا تھا۔ بعدازاں اچانک بندوق چلنے سے گولی قریب موجود دلہن کے والد کو جا لگی، جس سے وہ شدید زخمی ہوگئے۔واقعے کے فوری بعد اہل خانہ اور تقریب میں شریک افراد نے زخمی شخص کو طبی امداد کے لیے اسپتال منتقل کرنے کی کوشش کی، تاہم وہ جانبر نہ ہوسکے اور دم توڑ گئے۔دلہن کے والد کی اچانک موت کی خبر پھیلتے ہی گھر میں کہرام مچ گیا۔ جس گھر میں کچھ دیر قبل شادی کی خوشیاں منائی جا رہی تھیں، وہاں سوگ اور آہ و بکا کا ماحول چھا گیا۔ شادی میں شریک عزیز و اقارب بھی اس افسوسناک واقعے پر شدید صدمے سے دوچار ہوگئے۔اس واقعے نے شادی بیاہ اور دیگر تقریبات میں اسلحے کے غیر محتاط استعمال اور ہوائی فائرنگ کے خطرات کو ایک بار پھر اجاگر کردیا ہے۔ معمولی غفلت بھی کسی قیمتی انسانی جان کے ضیاع کا سبب بن سکتی ہے۔شہریوں سے اپیل کی جاتی ہے کہ شادی بیاہ اور خوشی کی دیگر تقریبات میں ہوائی فائرنگ اور اسلحے کے غیر محفوظ استعمال سے مکمل اجتناب کریں تاکہ خوشی کے مواقع کسی المناک سانحے میں تبدیل نہ ہوں۔
